Centre de formation Euro-Méditerranéen : le sentiment de Jean-Baptiste Luccioni
(A ridazzioni d'Alta Frequenza) - U prughjettu di centru di furmazioni auro-meditarraniu di catiguria 1 n’hè ghjuntu à a so fasa finali : cusì l’ani ditta, sta mani, Leon Luciani, u prisidenti di l’AC Aiacciu, è Jean-Baptiste Luccioni, u merri di Pitrusedda. Hà dittu di fatti, a squadra, ch’idd’hà vindutu un ettaru è mezu di tarreni di soiu à un gruppu d’invistidori. Cù un prezzu chì s’avvicina à i 150 o 180 auri à metru quadratu, a vincita pudaria andà da 2,3 à 2,7 milliona d’auri. Hè dunqua cù issa vendita chì a squadra aiaccina pò finalizà u so prughjettu di centru, chì sarà fattu à nantu à a cumuna di Pitrusedda, à nantu à una stesa di 10 ettari. L’affari custaria circa 10 milliona, par 4000 metri quadrati di bastimenti, 5 tarrena naturali è unu sinteticu. U finanzamentu u purtarà a squadra, cù aiuti diversi di u statu è di l’auropa. Si farà in u Ruppionu, vicinu à Sant’Amanza.
Jean Baptiste Luccioni
