Cas de Paul-André Contadini : Università Morta ce mardi, des lycées de nouveau bloqués
(A redazzioni d'Alta Frequenza) - A ghjuventù corsa cuntinueghja a so mubilisazioni à prò di Paulu Andria Contadini, imprighjunatu in Fresnes è chì, postu ch'ellu ùn hè micca avvicinatu in Borgu, hà principiatu u 15 di sittembri scorsu una greva di a fami. Ssu marti da mani, parechji licei in Aiacciu, Bastia è Corti sò stati torna bluccati da militanti di a Ghjuventù Indipendentista, com'è l'Università di Corsica pà una ghjurnata "università morta". Duranti un'assemblea generali urganizata in a facultà di lettari, a GI hà vulsutu alertà tutta a cumunità studientina annant'à ssu cartulari è arricà torna u so sustegnu à tutti i prighjuneri è i ricircati pulitichi. Hè statu dicisu dopu à quissa d'urganizà una veghja stasera à 7 ori davanti a sottu prifittura di Corti. Da un'antra banda, u rettori d'accademia hà mandatu ssu luni un cumunicatu cuncirnendu i manifistazioni liceani. "A libertà di sprissioni hè una libertà fundamintali ch'ellu ci voli à rispittà. Ma ùn devi micca impidiscia l'altri libertà è par asempiu a libertà di passà è di vena. I stabilimenti devini pudè firmà libari d'accessu parchì a Scola raprisenta u locu di a trasmissioni di u sapè parmittendu di furmà è d'educà i citadini schjariti di dumani", dici Michel Barat. "Ùn m'apparteni micca di dà un'upinioni parsunali annant'à ssu muvimentu di cuntistazioni. Inveci, lampu oghji una chjama sulenna à a rispunsabilità di tuttu ognunu", compii u rettori.
Steti à senta à Jean André Marchiani, u presidenti di a Ghjuventù Indipendentista.
Sur le même sujet
