Blocage du CET de Vico : la mise au point du SYVADEC
(A redazzioni d'Alta Frequenza) - In un fugliettu diffusatu ssu luni da mani nant'à i reti suciali, u cullittivu Pumonte Pulitu faci cunnoscia a so scuntintezza cuncirnendu u centru d'intarru tennicu di i rumenzuli di Vicu. In fatti, Pumonte Pulitu dinunzia inde ssu ducumentu un prughjettu novu di u SYVADEC di fossu o di piattaforma di trattamentu di i rumenzuli biologichi nant'à u situ, "cù a cumplicità palisata di l'intercumunalità di u Pumonte è a maghjurità di l'eletti lucali". Si trattaria di fattu di una piattaforma pà fà suvaccioni, è u cullittivu temi un risicu maiò pà contu soiu : chì u rughjonu divintessi "torna è d'una manera chì volta sempri l'anni passendu u scolu di a Corsica sana". È d'aghjustà chì cù a sarratura di a piattaforma aiaccina di Baleone, ssu tarritoriu sarà "cundannatu à firmà a rumenzula di a CAPA". U cullittivu, chì dumanda di caccià tuttu simpliciamenti u prughjettu, blocca dipoi u principiu di a matinata u situ di Vicu. Pà contu soiu, li dispiaci di sicuru à u SYVADEC ssu blucchimi novu. Dici torna ch'ellu rispetta l'accordi ricenti trà ellu è u cullittivu frà altru. Chjama ss'ultimu à principià cun ellu un dialogu custruttivu è voli pricisà chì ssa piattaforma, chì n'hè solu à u nivellu di a riflessioni, ghjuvarà solu à u rughjonu di u Pumonte.
Steti à senta à Catherine Luciani, a direttrici di u SYVADEC.
