Baccalauréat 2013: les sujets de philosophie en filière générale
(A redazzioni d'Alta Frequenza) - Principiu stamani (luni) pà i 2428 elevi corsi di u bascigliè 2013. Quist'annu, sò 1274 scritti à u baccu ghjinirali, 570 à u baccu prufiziunali è 584 à u baccu tennologicu. Com'è sempri, l'asamini hà cuminciatu pà u bascigliè ghjinirali issu luni da mani cù una prima prova scritta, è micca a menu putenti, postu chì si tratta di quilla chì faci à spessu a paura à parechji sculari, a filusufia. I candidati ani avutu quattru ori pà travaghjà, cù trè sughjetti pussibuli, dui dissertazioni è una spiecazioni di testu. Ind'a seria literaria, induva a filusufia t'hà u cuefficenti u più altu (7), i sughjetti erani quissi quì: "U linguaghju hè solu un arnesi?", "A scenza hè limitata à custatà i fatti?", o tandu ci vulia à spiecà un testu di René Descartes strattu da "Lettre à Elisabeth". Ind'è i scentifichi (prova cuefficenti 3): "Si pò agiscia cù murali senza intarissà si à a pulitica?", "U travaghju parmetti di pighjà cuscenza di sè?", o a spiecazioni di un testu di Henri Bergson strattu da "La pensée et le mouvant". Infini pà a seria ecunomica è suciali (cuefficenti 4): "Chì divimu à u Statu?", "S'intrapreta s'è omu ùn cunnosci micca?" o a spiecazioni di un testu d'Anselme strattu da "De la concorde". L'eti capita, u linguaghju, a scenza, u Statu, a murali, u travaghju è a pulitica erani dunqua à u prugrammu di issa prova ; da chì dà argumenti à tutti i candidati ispirati, soprattuttu quandu omu t'hà un sguardu finu nant'à l'attualità è a sucità attuali. Seguita di i provi di u bascigliè ghjinirali dumani, cù a Storia è a Geugraffia. I risultati elli, sò aspittati pà u 5 di lugliu...
Sur le même sujet
