Arnaques et testa mora
(A redazzioni d'Alta Frequenza) - A staghjoni turistica hè lanciata, o micca parchì tuttu u mondu ùn hè micca d'accunsentu, è i numarosi cumerci, quilli duva si compra à magnà in particulari, sò carchi à marcanzii ditti "nustrali". Tuttu u mondu a sà oghji in Corsica, ma i turisti menu par disgrazia, chì ciò chì si vendi u più ind'è noi duranti ssu mumentu di l'annata, ùn sò micca i prudutti corsi ma a testa mora chì ci hè stampata. Cappelli, miloni, sarvietti pà andà à a piaghja, salami, picculi ughjetti chinesi, frumaghji, è a lista pò cuntinuà à l'infinitu guasgi, a testa mora hè dapartuttu è ghjova à ingannà u turistu. È ancu, certi cunsumatori, chì fighjulani pocu ss'affari, pudariani essa cuntenti s'è ssi prudutti si pagavani à u prezzu ch'elli valini daveru, u valori di i prudutti industriali, à u listessu nivellu cà u salamu famosu Cochonou. Ma par disgrazia ùn hè micca u casu, ancu pà i cunsumadori isulani, parchì u simbulu famosu di a Corsica ghjova di TVA corsa, pà daveru Tassa nant'à u pocu di Valori Aghjustatu. U sciffru ammintatu da certi media faci a paura: più di 90% di i prudutti vinduti chì sariani corsi, dunqua chì sariani com'ellu si dici nustrali, sò prudutti industriali. Ciò chì ùn tocca micca di più à Jean Marc Venturi, presidenti di a Camara d'agricultura di Corsica Suprana.
Ecoutez-le.
