Annonces de Ségolène Royal en matière d'énergie : la satisfaction de Gilles Simeoni
(A redazzioni d'Alta Frequenza) - U gaz dispunibuli à partasi di a missa in serviziu, in u 2023, di a cintrali nova di u Vaziu! Eccu u scopu annunziatu arimani (luni) da Ségolène Royal in Aiacciu. A mani, a ministra di l'ambienti, di l'energia è di u mari avia prisintatu misuri impurtantissimi in materia d'eliminazioni di i rumenzuli è un pianu di surtita di crisa saria nant'à a strada bona. U dopu meziornu, duranti a riunioni di u cunsighju energeticu di a Corsica, Ségolène Royal hè andata più luntanu annunziendu a ghjunta di u gaz in u 2023, vali à dì chì a cintrali nova di u Vaziu ùn viaghjarà nè cù u fuel pisivu, nè cù u fuel lighjeru. U prughjettu hè cunnisciutu dipoi parechji anni: una custruzzioni in mari à u largu di Lucciana è un cunduttu pà fà falà u gaz fin'è Aiacciu. Pari chì u prughjettu avanzessi bè oramai parchì una mansa di criterii sò dighjà stati difiniti è u studiu generali sarà lanciatu à partasi di u mesi di lugliu. Gilles Simeoni era assai cuntentu parchì ciò chì hè statu annunziatu da a ministra ssu luni trapassa largamenti u solu prublema di l'alimentazioni in gaz di a Corsica. In fatti, hè a PPE sana, a prugrammazioni pluriannuali di l'energia, quilla missa in ballu da u cunsighju energeticu, l'Assemblea di Corsica è u Statu, chì hè stata validata da u guvernu.
Eccu l'intervista di u presidenti di l'Esecutivu di Corsica.
