Annonces de Bernard Cazeneuve : la réaction de Laurent Marcangeli

(A redazzioni d'Alta Frequenza) - I riazzioni ùn sò micca famosi in Corsica dopu a visita di dui ministri, è micca i menu impurtanti cuncirnendu l'affari chì ci intaressani, quillu di l'Internu è quilla di a Dicintralisazioni. A parolla "chiche", prununziata da Bernard Cazeneuve duranti u so discorsu davanti à l'assemblea di Corsica, duvaria firmà stampatu ind'i menti. Prununziata pà rida, ssa parolla, pricisemula, pò avè altri sensi cà quillu ch'ellu hà vulsutu dà u ministru di l'Internu. "Chiche", hè dinò "rancicu", "manigranchju", "micca troppu generosu" ed hè cusì chì parechji ani percepitu u discorsu ministiriali in Corsica. In fatti, Bernard Cazeneuve hà dittu ch'ellu si pudaria scriva ind'a legi NOTRe di l'urganisazioni tarrituriali nova di a Republica un amendamentu chì pudaria parmetta di crià a Cullittività Unica in Corsica è què in un tempu assai cortu di trè anni. Puntu impurtanti, ed hè a sola manera d'andà in furia : u referendum vulsutu d'una manera cusì forti da eletti numarosi in Corsica, ùn parmittaria micca di suvità ssu calendariu. U ministru hà rinviatu dunqua l'assemblea di Corsica davanti i so rispunsabilità : sia scegli di crià ssa cullittività unica in un tempu assai cortu, sia ssa riforma hè rimandata à assai più tardi è integrata à riforma più glubali di u statutu di a Corsica. L'annunzii, i v'emi dighjà fattu cunnoscia, sò stati accolti micca tropu bè da i furmazioni naziunalisti chì ani accertatu, l'una è l'altra, ch'ellu "ùn c'hè micca u contu". Laurent Marcangeli, chì era à l'assemblea di Corsica ssu vennari, hà suvitatu cun attinzioni u discorsu di u ministru di l'Internu. A fusioni di i trè cullittività di Corsica i più miaò in una sola, un prughjettu micca troppu alluntanatu infini da quillu di Nicolas Sarkozy è ricusatu dopu à un referendum in u 2003, li pari essa piuttostu intarissanti. Eppuru, i mudalità di missa in forma li parini torna micca abbastanza chjari è soprattuttu a nascita di una riforma di più cunsequenti ferma iputetica par ellu.

Steti à senta à Laurent Marcangeli, u diputatu è merri d'Aiacciu.