Le Direct

Alerte vent : des foyers privés électricité - La diffusion d'Alta Frequenza perturbée

(A redazzioni d'Alta Frequenza) - Dopu à i buffulati di ventu chì ani toccu a Corsica dipoi vennari à sera, casi numarosi sò sempri privi d'elettricità ssa dumenica matina. I servizi d'EDF in Corsica facini un puntu à 7 ori ; "À u mumentu u più forti di u timpurali, versu 3 ori, 9000 clienti erani senza alimentazioni elettrica. I primi uparazioni ingaghjati ani parmissu di stabilizà u numaru di casi cuncirnati à 6500. I nostri squadri sò oramai annant'à u tarrenu pà truvà i panni accaduti è d'ingaghjà a so riparazioni. Hè calatu in intensità u ventu dipoi 4 ori di mani, ciò chì rendi i cundizioni d'intarvinzioni menu siveri. I lochi i più tocchi sò sempri in maghjurità in Corsica Suprana (5500 casi) : Capicorsu, Nebbiu, Costa Verde, Casinca, Centru di a Corsica. In Corsica Suttana (1000 clienti) : Coti, Pitretu, Figari... EDF ramenta ch'ellu ùn ci voli micca à tuccà i fili elettrichi cascati in tarra è chì tandu ci voli à chjamà i servizi d'EDF subbitu à u 09 72 67 50 20". Ssi tagliaturi, indipindenti di a nostra vulintà è ch'è no spiremi i più corti pussibuli da fà ch'è vo pudissiti ritruvà i vostri prugrammi prifiriti, toccani a diffusioni di Radiu Alta Frequenza in Aiacciu è u so rughjonu è dinò in i circonda di Bastia