Ajaccio : une opposition municipale sans concessions mais pas négative
(A redazzioni d'Alta Frequenza) - Simeoni Marcangeli, Marcangeli Simeoni ! I ghjurnalisti corsi facini ghjirà senza piantà i maghjini di i novi merri di dui cità maiò isulani ; un casu di figura impussibuli à pinsà calchì mesi fà. Purtati da maghjurità propiu cunfurtevuli, ssi dui parsunalità ringhjuvaniscini di una certa manera a classa pulitica è raprisentani un cambiamentu veru di maghjurità municipali, in Bastia soprattuttu. In Aiacciu, u mumentu hè menu « Storicu » di sicuru, parchì s’hè intesu parechji volti ss’ultimi ghjorni "Vultemi in casa". Una rimarca di bon sensu postu chì a diritta aiaccina, torna culurita oghji di bunapartisimu, hè veradimenti in casa soia in merria. U veru cambiamentu, ed hè maiò, hè « l’età di u capitanu », 33 anni, calcosa d’ineditu ind’a Cità Impiriali è chì porta cun ellu una squadra più ghjovana è novi figuri pulitichi. Prima intervista, senza svianzi, di u merri d’Aiacciu. Rammintemi chì Stéphane Sbraggia hè oramai 1u aghjuntu ; sarà accumpagnatu, pà i cinqui primi aghjunti, da Nathalie Ruggeri, Stéphane Vannucci, Simone Guerrini è Pierre Pugliesi. L’uppusizioni, fora di a voci marghjinali d’Aiacciu Cità Nova, t’hà oramai 11 unità è à partasi di a riunioni di u novu cunsighju municipali, quissa quì hà vulsutu fà cunnoscia cù forza a so pusizioni futura. Senza participà à u votu, hà vulsutu impona u so rollu d’uppunenti di manera schietta di pettu à a nova maghjurità dirighjenti, un’uppusizioni chì malgradu tuttu ùn sarà micca negaitva, com’ellu a ci dici Paul Digiacomi, anzianu aghjuntu à u merri d’Aiacciu.
U stemi à senta.
Sur le même sujet
