Agriculture : FDSEA et JA2A bloquent le port de Bonifacio
(A redazzioni d'Alta Frequenza) - I Ghjovani Agricultori di Corsica Suttana è a FDSEA 2A bloccani dipoi stamani (marcuri) u portu di Bunifaziu. Ss'ultimi volini dinunzià "l'inerzia a più tutali" di i servizi di u Statu in materia di cuntrollu di i prudutti chì entrini annant'à u tarritoriu corsu. In fatti, mentri chì l'epidemia di Xylella Fastidiosa, chì sterpa una mansa di spezii vegetali in Italia minaccia di sparghjasi è chì a pesta purcina africana hè à i porti di u Maghreb, l'agricultori custatani chì nisun cuntrollu di i prudutti chì ghjunghjini in Corsica hè fattu da i dugani ind'i sfarenti porti isulani, com'è quillu di Bunifaziu. D'appressu à elli, casgiu chì ùn saria micca bonu pà a cunsumazioni in Sardegna saria vindutu inde l'isula à prezzu sciappatu par asempiu, mentri chì prublemi spuntariani dinò cuncirnendu a filiera vegetali cù a vendita di pianti micca cuntrullati. Timendu una catastrofa sanitaria mai cunnisciuta ma dinò prublemi à u nivellu ecunomicu, FDSEA è JA 2A dumandani dunqua à u Statu di metta in ballu subbitu un curdonu sanitariu inghjiru à l'isula è cuntrolli sanitarii siveri in tutti i porti pà l'animali è i vegetali.
Steti à senta à Pierre Toussaint Gaffory, u presidenti di a nova squadra FDSEA è pà i JA di Corsica Suttana.
