ACA-OM : le maire d’Ajaccio demande à l’ensemble des acteurs d’assumer leurs responsabilités, à commencer par les pouvoirs publics, afin de garantir la sécurité des Ajacciens

Dopu à i intoppi d’arisera trà sustinidori aiaccini è marsigliesi in cor’di cità, eccu u cumunicatu publicatu da a municipalità d’Aiaccciu, via u merri Stéphane Sbraggia :

1- U cabinettu di u merri avia avirtitu l’auturità prifitturali toccu vennari u 26 di maghju ch’iddu era impinsiritu da u scontru trà l’ACA è l’OM di sabbatu, u trè di ghjunghju. Ben’ch’idd’ùn achi impurtanza spurtiva pà i dui squadri u scontru, issi pinsera erani rinfurzati da parichji alerti, è masimu da i scambii via i reti suciali, allora chì calchì cintunai di marsigliesi erani aspittati à a vighjilia di u scontru. Trà quissi, parichji sò stati idintificati chì ghjunghjiani in Aiacciu senza albergu nè mancu bigliettu pà u scontru.

2- In stu quadru, M. Maestrali, u dirittori di cabinettu di u merri, hè andatu quattru volti in prifittura issi ghjorna, à dì ci a vulintà di u merri d’impidì u dispiazzamentu di i marsigliesi, in u filu di i misuri presi rigularmenti in u campiunatu di ballonu, quand’iddi sò idintificati i scontri à risichi.
Trà l’argumenti dati da a Cità : a manifistazioni di i Piscadori in Festa à nantu à u portu Tino Rossi, è u risicu altu di disturbi à l’ordini publicu è d’uffesa à a sicurità di i bè è di i parsoni.
3- In issu cuntestu, a Cità d’Aiacciu è u so merri rigretani ch’iddi ùn sichini stati presi issi misuri da l’auturità prifitturali, innanzi à u dispiazzamentu di i sustinidori marsigliesi, arrimbendu si à l’elementi dati da i rinsignamenta tarrituriali. Issa situazioni hà purtatu à publicà dui arresti municipali, ghjovi u primu di ghjunghju, da impidì à ugni parsona prisintendu si da sustinidori di Marseglia di ghjunghja in centru cità, ma ancu di cunsumà biendi alculizati pà issi vii, piazzi è spazia publichi da sabbatu u trè à duminica u quattru di ghjunghju.
4- Issendu ci stati i intoppi arisera in centru cità, u merri d’Aiacciu hà dumandatu ch’idda sichi scunviata a navi ind’iddi erani tanti i sustinidori marsigliesi aspittata par sabbatu matina, ch’idd’ùn creschini dinò i risichi liati à issa situazioni dighjà bedda tesa. D’altrondi, hà dumandatu à u prifettu è à i riprisintenti di u ministeru di l’internu ch’iddu ùn si faccia, parvia di u cuntestu,  issu scontru.

5- U merri rigreta à veru i cunsiquenzi, umani è matiriali, di ciò chì hè successu longu à issa sirata in u centru d’Aiacciu. Ùn ci n’hè evenimentu, masimu spurtivu, chì posca ghjustificà issa viulenza scatinata. Manda u so sustegnu à i parsoni ferti è à i cumircianti aiaccini chì ani avutu i so ardigni di travaddu dannighjati
6- Pà issa meza ghjurnata, a Cità d’Aiacciu è u so merri si chistiunighjani à nantu à u seguitu di l’evenimenti, è sò impinsiriti à veru. U scontru di sta sera issendu mantinutu, è i sustinidori marsigliesi issendu stati accolti in una « fan zone » à u Ricantu dopu essa sbarcati in Aiacciu, si poni sempri a quistioni par quiddi chì alloghju ùn n’ani, issendu intesa chì a maior’parti ùn pidda u battellu chè duminica, in fin’ di ghjurnata.

7- Parvia d’issu cuntestu, u merri d’Aiacciu ni chjama una volta di più à u calmu, è dumanda à tutti l’attori di piddà i so rispunsabilità, cumincendu cù i puteri publichi, da guaranzì a sicurità di l’aiaccini.