AC Aiacciu : Communication d'Alain Orsoni

Situazioni di l’AC Aiacciu : Alain Orsoni hà fattu un cumunicatu :

« u sfuglittinu, u pessimu sfuglittinu ùn hè ancu à finì. Ma circhemu ghjà à veda ciò ch’iddu si passa in daretu. U tistimognu di muralità Molina lenta cù forza cosi ch’iddu prisenta da virità virificati.
Dicu ch’iddu ùn hè unestu, è mi pongu a quistioni di i so mutivazioni veri.
In prima, ùn hè una scuparta a vendita di i tarrena : hè una guaranzia data à quiddi chì ani missu 4,7 miliona in a squadra par risolva una situazioni finanziaria aghjà pessima.

Sarà stata pà priveda ci un’uparazioni immubiliari ? Mancu à pinsà la, ch’ùn si pò custruì à nantu à issi tarrena.
Ci hè statu un accordu da permetta à a squadra di ripiddà li, par casu ch’iddu vochi meddu l’affari.

L’infrastrutturi (stadiu, loghji, tribuni, ginnasiu…) sò sempri è intigralmenti prupriità di a squadra.

Ciò ch’iddi chjamani « carta d’isciuta d’oru » hè un usu cumunu in casu di vendita, par pruteghja à quiddi chì si sò à veru impignati à prò di a squadra.
Ed hè a quissi ch’iddu si dumanda di dimissiunà ! Parini foli !

A misata di Daniele Bufano, chì avia un postu impurtanti innanzi d’essa prisidenti : era cunvinuta chì misata ùn avaria. Dunqua hà dumandatu à a Dirizzioni Umana di a so impresa l’auturisazioni di piddà issu postu da binivulanti. L’auturisazioni l’hà avuta ma, attempu publicata a so numinazioni, i dirigenti di a impresa l’ani licinziatu. Aviami tandu l’ublicu di cumpinsà issu fattu, è ùn ci hà vintu in iscambiu.

A più grossa scruccunaria d’issu bravu Romain Molina, i fondi CVC. À u cuntrariu di ciò ch’iddu conta, sò stati invistiti tutti in i travadda, cacciati dui miliona attribuiti à a prisirvazioni di i talenti llu centru di furmazioni.

Quissi sò fatti virificati, è ambiguità ùn ci n’hè.
È mi sminticu di a bomba d’issu dissinnatu, chì si metti à suspittà una cumplicità cù a DNCG. 

Quissa ci vulia à pinsà la ! Ma par rippidà à Audiard, diciaraghju « ch’iddi si ricunnoscini à iss’affari » !
À curtu andà, avaremu l’uccasioni di dà a prova di a noscia sincirità pà a guaranzia chì no’ avemu zifratu è u trasfirimentu.
Infini, par ciò chì tocca à i misati di a squadra, sò luntanu bè da supranà a media naziunali chì currispondi à un veru travaddu, masimu pà Johann Cavalli.
Diciaraghju in chjudenda chì un rispunsevuli hè naturalmenti spostu à a critica, ben’ch’iddu si posca parlà chivi di diffamazioni. Possu capì chì no’ sichimi brusgiati in piazza publica, Jean-Noël ed eiu, ma mi veni mali à accittà ch’iddi si facciani i rimprovari à parsoni chì ani datu tuttu pà a squadra ».