2nd tour des municipales d'Ajaccio : l'analyse
2nd tour des municipales d'Ajaccio : l'analyse
(A redazzioni d'Alta Frequenza) - 60/40 ! Era u scopu di Laurent Marcangeli pà vincia contr'à Simon Renucci duranti ssu remake di l'alizzioni municipali di marzu di u 2014 è ssu scopu hè statu guasgi toccu. Più di 4000 voti d'avanza, sò assai luntani i picculi 281 voti arrighjistrati a sera di u sicondu ghjiru in marzu scorsu, un sciffru cusì chjucu chì hà inghjinnatu un ricorsu in annulazioni, eppo ss'annulazioni ella stessa. U merri micca validatu hà riisciutu a so scumessa, ma era una scumessa difficiuli pà daveru, di cunfirmà u risultatu di u prima ghjiru di dumenica scorsa è ancu di fallu crescia. Cù una participazioni guasgi simuli trà i dui ghjiri, solu 400 parsoni di più ani vutatu ssa dumenica, i dui candidati arrighjistreghjani cresciti spettacularii, Laurent Marcangeli racogli 12 969 voti, vali à dì 3634 voti di più è Simon Renucci, chì avia racoltu à u prima ghjiru 6069 voti n'hà racoltu stavolta 8917, vali à dì 2848 di più. U diputatu d'Aiacciu riesci dunqua à mubilizà meghju cà u so avversariu parchì u paragonu di i voti arrighjistrati trà i dui ghjiri li dà una crescita di più di 800 voti. Puntu assai intarissanti da rimarcà, si ritrova à una trentina di voti guasgi i risultati di u prima ghjiru di Simon Renucci, José Filippi è Paul Leonetti insemi. L'analisi pulitica ùn si faci mai cù un simplici contu è ci vularà à studià da più vicinu i sciffri è soprattuttu ponasi a dumanda di sapè induv'elli sò passati i voti di François Casasoprana è dinò di u Front National.
Sur le même sujet
