Le Direct

14 juillet 1755 : L'Autre 14 juillet

(A ridazzioni d'Alta Frequenza) - 258 anni fà, u 14 è u 15 di luddu di u 1755, Pasquali Paoli era fattu Capu ghjinirali lla Nazioni Corsa, in lu cunventu di Sant’Antonu di Casabianca. Dopu à 15 anni d’esiliu, spicialmenti in lu righjimentu napulitanu « Corsica », Pasquali Paoli ritruvaia a so isula da participà à iss’alizzioni. À nantu à 40 pievi, sò stati 16 à participà à issa cunsulta ch’avia da cambià a storia lla Corsica. « ‘Emu pinsatu chì u meddu... era l’alizzioni d’un capu, un ghjinirali pà accupà si di l’ecunumia è a pulitica llu Regnu, è chì achi mezi senza limiti, cacciatu li ben’intesa l’affari llu Statu, chì cherini l’accunsentu lli pupulazioni o di i so diputati. U nosciu votu, unanimu, hè andatu à l’Eccilintissimu Signor’Pasquali Paoli, l’omu chì ci hè parsu u più degnu, in virtù è qualità ». Si dicidi, u ghjornu stessu, d’incuraghjì i truppi frusteri à disirtà, si scrivini legi, è supr’à tuttu, si cundannani à morti i corsi chì pudariani porghja aiutu à u numicu, si scacciani da l’isula i traditori, è si cundannani. Di fatti, a pusizioni di Paoli hè bedda più radicali chè quidda llu so babbu, vint’anni innanzi. L’affari hè vulsutu : ci hè una vera vulintà di rigori. Paoli è i so partisgiani dichjarani « una guerra perpetua à a ripublica di Ghjenuva è ad ugni putenza chì a vurria pruteghja »