11 novembre : mimoria è ombri di guerra
L’undici di nuvembri di u 1918, si cumpiia u maceddu di a prima guerra mundiali, chjamata « l’ultima di l’ultimi ». Custò à u mondu deci miliona di viti cristiani.
Carri armati, armi chimichi… Mai ùn s’era impignatu tantu u geniu umanu in l’arti di a morti.
Pà a Corsica, fù tarribuli u prezzu pagatu à a barbaria : 40 000 omini mubilizati, 12 000 morti, 25 000 ferti, 12 000 di quissi chì sarani invalidi à vita...
Un bilanciu più chè grevu, è chì hà da dannà pà un pezzu, longu à u XXesimu seculu, l’ecunumia isulana.
Ma si tinarà dinò a menti, d’issa guerra, a inghjustizia è a crudeltà, masimu pinsendu à quiddi « fucilati par dà l’esempiu », quiddi di u 173, u rigimentu di i corsi.