Yvan Colonna : retour sur le parcours d'un homme qui a toujours clamé son innocence

Yvan Colonna hà ripitutu sempri, è senza pichju, ch’iddu era innucenti, ch’iddu ùn c’era pà nudda in a morti llu prifettu Claude Erignac.
Da a so prima cunfarenza di stampa, à l’inizià di l’affari, à i so tanti currieri, à a so lettara mandata à u ghjurnali « Le Monde », è à i so trè prucessi, l’omu mai ùn hà cambiatu via.
Sempri si hè battutu da ch’idda sichi intesa è ricunnisciuta a so innucenza.
Yvan Colonna t’avia 62 anni, è t’avia dui ziteddi.

À tempu imparata a nova lla so morti, accolti ci n’hè statu parichji, è sò stati accesi candeli in quantità, da renda li umaghju è sustena a so famidda.

Yvan Colonna hè natu d’aprili di u 1960. Zitiddonu, campa in Nizza, ind’iddu passa u so baccu è attacca studii da essa prufissori d’aducazioni fisica è spurtiva, com’è u so babbu.

Ma à 21 annu, si laca l’Università è sceddi di rientra si ni in Corsica. U stessu annu, u so babbu hè elettu diputatu sucialistu di l’Alpi Marittimi.
Turratu si ni in u so paesu, Carghjesi, ci faci parichji mistiera, po’ si stalla da pastori.

Ingagiatu puliticamenti, faci parti di a CCN, po’ di a Cuncolta Naziunalista.

Di 1998, hè assassinatu in Aiacciu u prifettu Erignac.

U 22 di maghju di u 1999, Yvan Colonna hè ricircatu da a pulizza. Pidda tandu a machja. Ma ghjustu innanzi, hà dittu davanti à i camerà di televisioni ch’iddu era innucenti in st’affari.
Steti à senta unu strattu lla so presa di parolla.

Arristatu di luddu llu 2003, Yvan Colonna passarà trè volti in prucessu : in u 2007, in u 2009 è in u 2011. Mancu una volta ùn cambiò via, è sempri sempri hà mantinutu ch’iddu era innuncenti.

Imprighjunatu in Fresnes, Toulon è Arles, hà circatu in parichji volti à essa avvicinatu in Corsica. A classa pulitica corsa, è ancu quidda francesa, si sò mubilizati da ch’iddu li sichi cuncessu u drittu. Ma in darru.

Calchì sittimana fà, innanzi à u drama, u primu ministru francesu, jean castex, avia ricusatu ch’iddu li sichi cacciatu u statutu di DPS, è dunqua a pussibilità d’un’avvicinera, senza mancu cunsultà u so ministru lla ghjustizia.
U fattu, d’altrondi, poni a quistioni di u scartu, in francia, trà u puteri puliticu è a ghjustizia, chì ùn pari asista à veru.

Ci hè pocu, trè diputati erani andati à u so riscontru, in prighjoni d’Arles, è aviani dinunciatu un trattamentu « vili è cuntrariu à u drittu ».
Trà quissi, c’era François Pupponi. Davanti à a cumissioni di i legi di l’assemblea francesa, chì faci a inchiesta pà iss’assassiniu, hà parlatu d’issa visita.

Steti lu à senta.

Bruno Questel, diputatu LREM, ch’era ancu iddu d’issa visita, hà riagitu arimani, imparendu a morti d’Yvan Colonna.
« Sta sera, un omu hè mortu assassinatu », hà dittu u diputatu di l’Eure à nantu à l’ondi di france Info.

U diputatu voli « rispittà u tempu llu dolu ma pricisa quantunca ch’iddu ci voli ch’iddi sichini chjari bè i circustanzi d’iss’assassiniu. Quissa, si devi a u mortu. È si devi à a so famidda, à i so fiddoli, ma ancu à a sucità.
Ciò chì hè successu pà Yvan Colonna ci devi purtà à intarrugà ci, ancu par ciò chì tocca à i mutivazioni di l’assassinu.