Le Direct

Yvan Colonna : des questions, des doutes et le secret défense en réponse

L’evucazioni llu sicretu di difesa poni quistioni : sarà statu, Franck Elong Abé, un indicatori lli sirvizia di rinsignamentu ? Più và è più matriculighja à issa pussibilità, u prisidenti lla cumissioni d’inchiesta parlamintaria pà l’assassiniu d’Yvan Colonna.

Issu pinseri chivi tocca altri membri di a cumissioni. Cusì n’hè di u diputatu LFI Ugo Bernalicis : « Quand’iddu si tratta di sapè chì n’hè di i rilazioni di Monsieur Elong Abè cù i sirvizia llu rinsignamentu pinitinziariu, di sapè s’iddu era un elementu di u rinsignamentu, tandu si piattani daretu à l’argumentu ghjuridicu di u sicretu di difesa. Ugnunu ni pinsarà ciò ch’iddu voli, ma ci sò quantunca monda cosi ch’insuspittiscini », hà dittu l’elettu à france 3 Corsica.

Un beddu dubitu, dunqua, è sempri i stessi quistioni, dighjà posti à i primi audizioni : comu spiicà chì un omu cunsidaratu da radicalizatu, cù una vita carciarali carca à evenimenti gravi è piriculosi, achi pussutu prufittà di a indulgenza di l’amministrazioni pinitinziaria, è di quidda lla ghjustizia ? 

Fendu u paragonu, comu sarà chì Yvan Colonna, cù u so parcursu carciarali schiettu, sichi statu nigatu in tuttu in i so dritti, cù u ricusu di caccià li u statutu di DPS è d’avvicinà lu, postu ch’iddu n’avia u drittu ?

Issi quistioni, u diputatu Jean-Félix Acquaviva l’hà posti, issa sittimana dinò.
L’elettu vurria ancu cunnoscia a virità par ciò chì tocca à l’attitudina lli sirvizia di rinsignamenta, trattendu si di a surviglianza d’Elong Abè dopu à a so arristazioni in i tarritoria in guerra d’Afganistanu.

Steti à senta à Jean-Félix Acquaviva.