Yvan Colonna : affrontements dans les rues en Corse et réunion à Corte pour organiser la suite

Sta notti in Aiacciu, ci sò stati l’azzuffi, dinò, trà forzi di l’ordini è manifistanti.

U nosciu cullega di TF1 hè statu toccu à a ghjamba da una bomba di dispirsioni, è hè statu purtatu à u spidali. I panni è i capiddi d’una donna ani presu focu. Hè stata aiutata da parsoni è manifistanti, innanzi d’essa presa in carica da i succorsi.

L’azzuffi sò stati beddi viulenti davanti à a prifittura, à nantu à i cursi Grandval è Napulionu, è ancu versu a prighjoni è u tribunali, chì hè statu in parti picciatu.

Via un cumunicatu, hà dittu u prifettu lla Corsica chì, à 9 ori è mezu, si cuntaiani trè ferti cuntendu i manifistanti è u ghjurnalistu di TF1, fertu à a ghjamba.

Dici u prifettu ch’iddu hè attaccatu à a libartà lla stampa di trattà i manifistazioni, è porta u so sustegnu à u ghjurnalistu è a so ridazzioni. Ni chjama à appacià l’affari è à u dialugu, da fà ch’idd’ùn ci sichi calchì altra vittima.

In Bastia dinò, ci sò stati l’azzuffi. U prifettu llu Cismonti hà dittu ch’iddi sò stati ferti ottu pulizzieri o CRS, è chì un tiru di Lbd hà toccu i ghjambi d’un manifistanti.

I spinghjifoca ani presu in carica trè ferti : una parsona era sbussulata par avè rispiratu gasi lacrimatoghji, dui altri ani avutu piaghi à nantu à a chjeccula o in faccia, dici a prifittura.

U prifettu hà dittu dinò ch’iddu era statu fertu un fotograffu di Corse Matin.

À issu sughjettu d’altrondi, «a dirizzioni, a ridazzioni, i sizzioni SNJ, STC, FO, CGT è a Sucità lli ghjurnalisti di Corse Matin mandani u so sustegnu senza cundizioni à u so cullegu fertu è à quiddi minacciati, cundannendu di manera ferma agrissioni è minacci ».

Marcuri, in Corti, si sò trovi i sindicata di studianti è l’eletti lli muvimenti pulitichi. Issa riunioni hè durata deci ori è più. T’avia par scopu di difinì chì seguitu dà à u muvimentu, è di chì manera.

Fatta fini, si hè dicisu di creà un cullittivu pà cuurdinà è accumpagnà l’azzioni à vena lla ghjuvantù. À u cullittivu, li tuccarà à urganizà a manifistazioni unitaria, duminica in Bastia, cù trè rivindicazioni : Ghjustizia è Virità pà Yvan Colonna, libarazioni di tutti i prighjuneri pulitichi, è ricunniscenza llu Populu Corsu.

Steti à senta à Saveriu Luciani, à nomu llu PNC.

I sindicata studianti ani cunfirmatu a so vulintà di mantena a manifistazioni di duminica, in Bastia. Hè stata presa ancu a dicisioni di bluccà l’Università, è d’ùn fà ni cursi in visiocunfarenza sinu à a fini lla sittimana, à u minimu.

Steti à senta à Simon Pintrel, à nomu lla Ghjuvantù Paulina.