Yvan Colonna : 10 000 personnes à Aiacciu, une vingtaine de blessés
Ùn sò bastati u nivonu è u timpurali à impidiscia l’aienti d’andà a manifistà in Aiacciu, in mimoria d’Yvan Colonna : circa 10 000 parsoni si sò accolti in i Salini, è si sò avviati versu a prifittura, o l’imbasciata di francia, com’iddu diciaria u Cullittivu Parlemu Corsu.
Culandi, i forzi ditti di l’ordini c’erani in quantità com’è mai, è i carrughji à torru erani sarrati.
In a fila di l’aienti, eletti, studianti, culturali, spurtivi… era u populu chì viaghjaia in carrughju.
Subitu, versu a prifittura è u cumissariatu, sò partiti l’azzuffi. À i cocktail molotov d’uni pochi di manifistanti, ani rispostu i tiri di bombi lacrimatoghji, acciuncatoghji, di dispirsioni o incapacitanti di pulizza è ciandarmaria.
L’affari hè duratu una bedda parti lla notti.
Circa vinti manifistanti sò stati ferti. Trà quissi, dui sò stati tocchi bè, à una mani è à una ghjamba.
In prima sirata, Jean-Félix Acquaviva, u diputatu lla siconda circuscrizzioni llu Cismonti, ci spiicaia u parchì di a so prisenza, ma ancu i so spiranzi è i so pinsera.
Steti lu à senta.
Versu i 6 ori è mezu lla sera, un focu hà toccu un cunduttu di gasu, in u passaghju Boninu, in Aiacciu.
I squadri di Engie sò ghjunti prestu supr’à locu, è i spinghjifoca ani marcatu unu spaziu di sicurità. I suldata llu focu ani luttatu senza pichju contru à i fiari, è ani fattu l’evacuazioni llu palazzu toccu da issu dannu.
À mutivu di sicurità sempri, a distribuzioni llu gasu hè stata suspesa par 500 clienti.
Duvaria essa ristabilita à parta si da dumani in fin’di matinata, è si duvaria compia in sirintina.
Un parsunali tecnicu d’Engie si duvaria affaccà in casa d’ugni clienti.
Par casu ch’idd’ùn ci sichi nimu, sarà lacata una parolla, da pudè piddà cuntattu cù i squadri tecnichi chjamendu u 0 800 47 33 33 (numaru verdu) è fà ristabilì a distribuzioni llu gasu.
Sur le même sujet
