Visite de Manuel Valls en Corse : le message du CD2A sur la collectivité unique
(A redazzioni d'Alta Frequenza) - Hè ssu luni da mani ch’ella principia a visita ufficiali di u Prima ministru Manuel Valls. Hè accumpagnatu da Jean Michel Baylet, ministru di l’Accunciamentu di u tarritoriu, di Najat Vallaud Belkacem, ministra di l’Educazioni naziunali, d’Audrey Azoulay, ministra di a Cultura, d’Emmanuelle Cosse, ministra di l’alloghju è di Christian Eckert, secretariu di Statu in carica di u bughjettu. Principia ssa visita à 8 ori è mezu in Aiacciu cù u puntu maiò di a ghjurnata, una riunioni cunclusiva di i gruppi di travaghju in prifittura di Corsica. U puntu cintrali sarà custituitu da i discussioni nant’à l’urdinanzi rilativi à a criazioni di una cullittività unica. Cunclusioni chì sarani prisintati à partasi d’11 ori da u Prima ministru in a Cullittività tarrituriali di Corsica. Si n’andarà dopu in Bastia in mità di dopu meziornu, prima di parta in Capicorsu pà l’inaugurazioni in Erbalonga di i casali di l’intercumunalità. Sempri pà ssi lochi, Manuel Valls è Jean Michel Baylet passarani in Macinaghju pà a prisintazioni di u prughjettu di parcu marinu, prima di vultà in Parighji in principiu di sirata. Ramintemi chì tutta a simana passata, i presi di pusizioni di l’uni è di l’altri si sò multiplicati pà fà ricullà à u Prima ministru missaghji chjari. L’Associu Sulidarità è a LDH prima, chì volini alertà u Prima ministru nant’à a sorti di i prighjuneri pulitichi corsi, i sindicati di salariati dopu, chì cuntinueghjani à mughjà forti a so uppusizioni à a legi El Khomri è u Cunsighju dipartimintali di Corsica Suttana, chì cuntinueghja a so ribellioni contr’à a cullittività unica.
Steti à senta à Pierre Jean Luciani, presidenti di u CD2A, nant’à u foru urganizatu a simana passata.
Sur le même sujet
