Le Direct

Visite de la Secrétaire d'Etat au Commerce en Corse: déception pour Gilles Simeoni

(A redazzioni d'Alta Frequenza) - Una dillusioni ! Ss'infrasata hè vultata à più pudè dopu a visita in Corsica di a Secretaria di Statu à u Cummerciu è à l'Artisgianatu, Martine Pinville. In fatti, dopu una ghjurnata longa di travaghju, cù visiti nant'à u tarrenu dinò, era maiò a dillusioni dopu à l'annunziu da a ministra di i misuri ritinuti da u guvernu pà pruvà à arrigulà à u più i difficultà di l'intrapresi chjuchi è mezani di Corsica. Una cellula di ricerca di i difficultà, una dumanda ind'è i banchi dumandenduli di più "cumprensioni", una cacciamossa urganizata contr'à tutti i formi di fraudi liati à u travaghju, è infini un inviluppu di 20 millioni d'auri ghjunghjendu da u PEI sò stati annunziati da Martine Pinville. Dillusioni di sicuru pà Gilles Simeoni, chì ùn hà micca trovu i misuri di u guvernu à l'altezza di i difficultà scuntrati oghji da l'intrapresa corsa. Di sicuru, certi punti pudarani essa ritinuti com'è essendu pusitivi, ma nant'à u fondu di u prublema, è soprattuttu à mezu è longu andà, si pò dì ch'ellu ùn c'hè nulla di novu. Gilles Simeoni hà vulsutu dì à a ministra chì u prublema di l'intrapresi corsi hè un prublema glubali chì ùn ricevi micca da Parighji tutta a primura aspittata.

Eccu l'intervista di u presidenti di l'Esecutivu di Corsica.