Violents orages en Corse : l'heure du bilan a sonné
A prifittura llu Cismonti hà fattu ghjovi à sera u bilanciu di a passata di i scurruttoni, curta ma colpu à colpu viulenti.
I 180 spinghjifoca mubilizati sò sempri in attività sinu à vennari, par casu ch’iddu riparti calchì focu parvia di fulmini o accinditi.
Trà Calvi è Lisula, una dibulezza in l’alimintazioni elettrica hà toccu circa 10 000 clienti è hà missu in difficultà i cumunicazioni teleffonichi.
Gramazia à iss’intarventi rapidi mentri a timpuralata, vittimi ùn si ni conta in u dipartimentu par avali.
Un coppiu è u so ziteddu sò stati accolti di notti in u centru di succorsu di Calvi, a so vittura avendu calchì dannu.
Uni pochi di parsoni ch’erani mossi à campighjà sò stati accolti in lucala sicurizati, gramazia à una bedda mubilisazioni sulidaria.
Issendu beddi disturbati, i vola partuti da Calvi par andà in Orly è Marseglia sò stati avviati versu Nizza è Bastia.
U volu partutu da Orly par andà in Bastia hè statu avviatu in prima versu Nizza, ma fatta fini l’hè tuccata à turrà in parigi.
U volu trà Nizza è Bastia hè statu attimpatu, par tena contu di u tempu.
In Calvi, i buffulati di u vintulioni ani fattu mova un avviò staziunatu in tarra, in l’aeruportu.
I trasporti stradali sò stati beddi disturbati, parvia d’arburi cascati, di mubiglia urbana, di cavi elettrichi o di cantona sfraiati.
In Pumonti, hè u Nordu llu dipartimentu ch’hè statu toccu u più.
33 spinghjifoca sò stati mubilizati par dodici intarventi.
Ottu intarventi sò stati gistiti arrimbendu si à u sirviziu di i stradi di a cullittività di Corsica.
Sò stati ricivuti circa sissanta chjami in un’ora è mezu.
À nantu à i stradi sò cascati arburi, mubiglia urbana è fili elettrichi, ma senza ch’idda ni sichi disturbata a distribuzioni.
A circulazioni inveci, hè stata quantunca disturbata.
