Villas Amhan d'Ajaccio : le Tribunal Administratif annule la vente des terrains
U tribunali amministrativu di Bastia hà datu raghjoni à Jean-Paul Carrolaggi : hà abrugatu una dilibarazioni llu cunsigliu municipali d’Aiacciu liata à a vendita di tarrena cumunali, ind’idd’erani stati custruiti i casi ditti Amhan, à nantu à a strada lli Sanguinarii.
Issi casi erani dunqua stati custruiti for’di legi.
« Fendu drittu à a dumanda d’un cunsiglieri municipali, u tribunali rimarca chì l’eletti ùn sò stati infurmati à bastanza da a cumuna, da fà valè u so mandatu in cunsiquenza.
Cusì, i dilibarazioni si sò fatti via un prucidimentu irrigularu.
In più di quissa, u tribunali faci custatu chì a vendita di tarrena soi hè stata fatta da a cumuna par rigularizà issi casi, chì sò stati fatti in viulazioni di i reguli di l’urbanismu, è par fà fiascà l’arresti di a corti d’appellu di Bastia, chì aviani cundannatu l’autori di l’infrazzioni à fà i travadda da metta si in cunfurmità cù i permessi di custruì attribuiti », dici in chjudenda u resu contu llu tribunali amministrativu.
Infini, u tribunali amministrativu « dà ordini à a cumuna d’Aiacciu di chjamà ni à u tribunali ghjudiziariu, solu cumpitenti in a cunniscenza di i cuntratti di venditi di tarrena, da ch’iddu tirghi cunsiquenza di l’abrugazioni d’issi dui dilibarazioni ».
