Vents forts : appel à la vigilance et à la prudence en Haute-Corse
(A redazzioni d'Alta Frequenza) - I servizi di Météo France privedini, da ssu marcuri dopu meziornu à 4 ori fin'è vennari à mezanotti, un episodiu di venti forti. U Libecciu, dighjà abbastanza forti marcuri dopu meziornu ind'a parti Nordu di a Corsica (Balagna è Capicorsu, buffulati trà 90 è 110 chilometri par ora) diventa forti ind'a nuttata trà u 13 è u 14 di lugliu è colla fin'è 110/130 chilometri à l'ora nant'à a Balagna urientali, a muntagna è Capicorsu (passaghju pà u latu urientali versu Bastia, A Sulinzara). Un'accalmia hè privista ghjovi da mani ma u ventu ferma sustinutu nant'à i capi cù buffulati da 80 à 90 chilometri à l'ora. Pà limità i risichi è renda più faciuli l'intarvinzioni di i servizi di succorsu, hè statu sceltu, in leia cù i pruceduri di regula, di sarrà l'accessu à i lochi di muntagna in furesta i più sposti fin'è u ritornu à un nivellu di periculu infiriori, podassi à a fini di ss'episodiu di ventu. Di fattu, a circulazioni di i parsoni, a circulazioni è u staziunamentu di i vitturi sò stati difesi da un arrestatu prifitturali nant'à i chjassi è i vistichi, nentru à ssi spazii sinsibuli, vali à dì u tarritoriu di l'Agriate, i lochi di muntagna di u Fangu è a furesta di Bunifatu.
