Vent fort et houle en Corse : prudence !
(A redazzioni d'Alta Frequenza) - Un episodiu di ventu da punenti à nordu punenti tocca u latu uccidintali di a Corsica Suttana dipoi arisera (marcuri) pà durà fin'è stasera. Annant'à i settori custieri i più sposti (Sponda meziornu - punta di Coti Chjavari pà u golfu d'Aiacciu è Sagone Tiuccia), u ventu da 30 à 40 chilometri par ora inghjinnarà marosuli trà trè è trè metri è mezu. Buffulati di 100 chilometri par ora pudarani essa custatati annant'à i capi, i cresti è i cimi. A prudenza a più maiò hè dunqua racumandata, par asempiu pà ciò chì cuncerna a pratica d'attività in mari o in a natura. U ventu hà da suffià abbastanza forti dinò in Corsica Suprana, soprattuttu in Balagna è in Capicorsu. Di fattu, a prifittura hà dicisu di pruibiscia a circulazioni annant'à i camini di l'Agriati, a furesta di Bunifatu, i muntagni di u Fangu, Manganellu è di Verghjellu da ssu ghjovi sei ori di mani fin'è vennari à sei ori di mani, è da vennari à ondeci ori fin'è sabbatu à sei ori di mani. Pinia è Mansu duvariani essa tocchi dinò. Pà l'apartura di a caccia vennari, i cacciadori t'avarani solu pà ssu ghjornu un'autorisazioni trà 6 ori di mani è 11 ori.
