Vanina Borromei succède à Jean-Félix Acquaviva à la tête de l'Office des Transports de la Corse
(A redazzioni d'Alta Frequenza) - Zeppu è chì arricchisci ! Eccu comu Ghjuvan Filici Acquaviva qualificheghja u bilanciu di i 18 mesi induv'ellu hè statu presidenti di l'Uffiziu di i Trasporti di a Corsica. U diputatu novu di u sicondu circondu di Corsica Suprana hè ubligatu in fatti à lacà i so funzioni à u capu di l'UTC. Hè Vanina Borromei, vici presidenti di l'Assemblea di Corsica, chì hà da pighjà a so successioni à ssu postu quì; sarà anch'ella rimpiazzata nant'à i banchi di i cunsighjeri tarrituriali Femu a Corsica da Antonia Luciani. Cantieri maiò dighjà bè principiati è tappi impurtanti aspettani a nova presidenti di l'Uffiziu di i Trasporti, com'è a custituzioni di i dui SEMOP, sucità d'ecunumia mista cù uparazioni priuritaria, in u quadru di a futura cuntinuità tarrituriali marittima. U travaghju hà da cuntinuà dinò pà ciò chì tocca a missa in opara di un sirviziu publicu marittimu trà a Corsica è a Sardegna, a calata di i prezzi pà i marcanzii, o ancu a missa in ballu di un metrò aereu Tuscana-Corsica-Sardegna-Baleari-Barcelona da quì à pocu. Pà vultà nant'à Ghjuvan Filici Acquaviva, t'avarà quantunqua a funzioni di cunsighjeru tennicu è puliticu pà a nova presidenti di l'UTC è firmarà dinò presidenti di u Cumitatu di Muntagna. U diputatu s'impignarà propiu à u Palazzu Bourbon pà fà avanzà certi cartulari purtati cù tanta forza duranti un annu è mezu à l'Assemblea di Corsica ?
Steti à senta à Ghjuvan Filici Acquaviva.
