Un flux touristique non adapté pourrait rapidement se faire dramatique, selon le professeur Barbolosi
Cù una staghjoni chì pudaria essa mucata da u siscu, s’invispisci u dibattitu par ciò chì tocca à a intruta, libara o micca, di i turisti in Corsica. Pà u prufissori Dominique Barbolosi, duttori in matimatica, ci voli à piddà si la cù a calma.
Inveci d’attaccà liti è caccià si l’ochja par quattru solda, meddu saria à dà calchì risposta pricisa.
A prima quistioni hè quidda di u valori di i virifichi fatti, innanzi à a partenza, par quiddi chì vurriani vena in Corsica. Quiddi ch’ùn sò à favori d’issa misura dicini chì issi virifichi ùn sò sicuri, cù una pussibilità di sbagliu chì tocca i 30 %. Tandu, parchì fà ustaculu à issu turismu chì tantu vali pà l’ecunumia ?
Pà u prufissori Barbolosi, ùn sò à veda cussì l’affari.
Cunsidarendu chì a pussibilità di cascà malatu hè di 2 par 1000, par 300 000 parsoni ch’intrariani in Corsica, 600 sariani pusitivi senza fà i provi. Fendu li, issi provi, si calaria à 200 parsoni pusitivi.
Sapendu chì 4 % di i parsoni pusitivi facini i cumplicazioni, à i sirvizia di rianimazioni li tuccaria à piddà in contu 24 parsoni s’idd’ùn sò fatti i provi, è 8 solamenti s’iddi sò fatti capu nanzi.
Cù issi provi, si pirmittaria à i midicanti di sfrancà si la d’una prissioni para à quidda d’issi sittimani scursi. Dici u Prufissori Barbolosi ch’idd’ùn vali a pena à attaccà ni lutta, senza armi nè cumbattanti.
Stemu lu à senta.
