Un ex-élu et un maire devant le tribunal correctionnel de Bastia ce mercredi
(A redazzioni d'Alta Frequenza) - Parechji prucessi è dumandi di sintenzi arimani in u tribunali di Bastia cuncirnendu eletti. Gilles Brun prima, anzianu presidenti di a cumunità di cumuni di Calvi è Balagna, passava davanti a ghjustizia pà presa micca legali d’intaressu à fiancu à u so cugnatu. U ministeru publicu hà dumandatu 18 mesi di prighjoni attimpati, 15 000 auri d’amenda è 5 anni senza pudè essa elettu contr’à Gilles Brun. A difesa hà dumandatu pà contu soiu chì u so clienti sighi assoltu. A sintenza sarà cunnisciuta u 9 di maghju. Altru cartulari, quillu di u merri di Tallone, Christian Orsucci. A ghjustizia li rimpruvareghja d’avè participatu à l’elaburazioni di u PLU mentri chì certi pezzi di tarri cuncirnati da u futuru ducumentu appartiniani à a so famighja, è sariani divintitati custruttibuli. Un annu di prighjoni attimpatu, 10 000 auri d’amenda è cinqui anni senza pudè essa elettu sò stati dumandati. A difesa hà dinunziatu una dumanda di sintenza « propiu sprupusitata » è hà dumandatu chì u so clienti sighi assoltu. A dicisioni sarà cunnisciuta dinò quì u 9 di maghju.
Sur le même sujet
