U Riacquistu di Portivechju craint à terme une privatisation de la mer
(A redazzioni d'Alta Frequenza) - « Dopu a tarra, u liturali : a privatisazioni di u mari ! » Eccu ciò ch’elli temini da quì à pocu i membri d’U Riacquistu di Portivechju chì urganizavani ssu ghjovi una cunfarenza di stampa. In fatti, u partitu naziunalistu dinunzia in Purtivechju, nentru à u Parcu Marinu Internaziunali di i bocchi di Bunifaziu, autorisazioni in traccia d’essa accittati pà a criazioni di lochi « privati » induva i battelli pudarani lampà l’ancura dati à associ d’abitanti in Palumbaghja, Cala d’Oru è Cala Purcina. Associ cumposti soprattuttu, sicondu u Riacquistu di Portivechju, di pruprietarii di residenzi sicundarii chì pudariani tandu appighjunà a so casa cù battellu ciò chì li parmittaria di truvà un prufittu assai intarissanti. S’aghjustaria à què l’affittu di 25% d’ancuraghji pà u passaghju. Sempri d’appressu u partitu naziunalistu, a cumuna di Purtivechju hà incuraghjitu eppo datu un avisu pusitivu à ss’autorisazioni, chì poni essa rinnuvati trè volti tutti i cinqui anni, è ùn hà micca usatu u so dirittu priuritariu. S’è U Riacquistu hè cuscenti chì l’ancuraghji salvatichi ùn poni più essa accittati, pensa malgradu tuttu chì tocca à a municipalità di gistiscia u so spaziu custieru è micca à privati, è li dumanda di pighjà i so rispunsabilità à u ssu nivellu quì.
Steti à senta à Dumè Tafani, pà u Riacquistu di Portivechju.
Sur le même sujet
