"U Presidenti di a Republica attizza i brasgi" pà Core in Fronte cuncirnendu a Corsica
(Michaël Andreani - Alta Frequenza) - Un discorsu d'Emmanuel Macron chì ùn si pò accittà, neuculuniali, ma chì si pudia priveda ! Eccu u custatu di Core in Fronte dopu a visita in principiu di simana nant'à l'isula di u Presidenti di a Republica Francesi. Ss'ultimu, sicondu u muvimentu naziunalistu, "attizza i brasgi torna caldi è, à l'appaciata pruposta da a Corsica upponi u disprezzu republicanu francesi". Di fatti, pà Core in Fronte, nisun dialogu veru, nisun prucedimentu di paci, ùn pò cuncirnà solu una parti, è a Francia ùn hà "mai avutu l'intenzioni di neguzià calcosa". U muvimentu chjama "tutti i forzi patriottichi à a cunvergenza di i lotti" par inventà frà altru tutti insemi un mudellu di sucità spicificu. Pà ciò chì tocca u mesi di travaghju chì s'apri inghjiru à una riforma custituziunali pà l'eletti di a maghjurità tarrituriali cù u guvernu, l'articuli 72 o ancu u 74 ùn sò micca adattati pà sbuccà nant'à un veru statutu d'autunumia di dirittu pienu, d'appressu à Core in Fronte.
Steti à senta à Paul Félix Benedetti.
