Trente ans de la catastrophe de Furiani : un recueillement fortement suivi ce jeudi
Ben’ch’idd’achi piuvitu senza pichju, sò stati parichji cintunari, i parsoni ghjunti arimani à renda umaghju à i vittimi di Furiani in pedi à u Mimuriali, trenta anni dopu à u straghju.
Dopu à una canzona fatta à posta è cantata da ziteddi di Cervioni, sò stati sposti i fiori, ch’iddi sichini quiddi llu prifettu llu Cismonti o quiddi di tanti parsunalità pulitichi.
U munimentu hè statu binidittu, è dopu à u discorsu di Josépha Guidicelli, a prisidenti llu Cullittivu lli vittimi, Soledonna hà cantatu u Dio Vi Salvi Regina.
A mubilisazioni pà u ricordu ci hè stata, ancu ind’è i ghjovani, è quissa rincheri à Josépha Guidicelli.
Steti à senta à Josépha Guidicelli.
Trà i parsoni prisenti ugni annu, ci hè Karine Grimaldi. À l’epica, t’avia 19 anni, è hà persu à Santa, a so suridduchja di quindici anni, quidda sera.
Issu straghju, ancu ad idda, l’hà marcata fisicamenti, postu chì dipoi ch’idda hè cascata quidda sera, hè duventa tetraplegica.
Trenta anni dopu, Karine Grimaldi hè sempri chivi, pà a so suredda, pà i soi, pà u so babbu mortu calchì mesi fà.
Trasmetta u ricordu, è avè vintu issa battaglia di a sacralisazioni llu 5 di maghju, sò d’issi cosi chì v’appaciani un pocu u cori.
Oghji, Karine Grimaldi circa à campà nurmalamenti, malgradu i so difficultà, pruvendu à fà strada, ancu s’idd’ùn hè sempri cusì asattu.
Steti la à senta.
