Le Direct

Territoriales : la liste portée par Valérie Bozzi déterminée à faire tomber les nationalistes

(A redazzioni d'Alta Frequenza) - Una lista chì voli essa u polu d'adunita d'una maghjurità alternativa ! Hè cù ssi parolli chì Valérie Bozzi hà prisintatu ssu luni in Aiacciu i 62 nomi chì l'ani da accumpagnà duranti l'alizzioni tarrituriali di u 3 è di u 10 di dicembri, cù com'è slogan "Voir plus grand pour elle". Una lista arradicata à diritta è à u centru à maiò parti, cù u sustegnu naziunali di Les Républicains, ma dinò aparta à parsunalità com'è Pierre Ghionga, anzianu cunsighjeru esecutivu di manca à l'epica di Paul Giacobbi è aderenti di la République en Marche, seiesimu nant'à a lista. Inde i primi piazzi, ritruvemi com'è sicondu à François Xavier Ceccoli, merri di San Ghjulianu, a cunsighjera tarrituriali Stéphanie Grimaldi, terza, o ancu à u quattriesimu postu u presidenti di u Cunsighju Dipartimintali di Corsica Suttana, Pierre Jean Luciani. S'è duranti a prisintazioni di ssa lista, calchì puntu di u prugramma hè statu svilatu, soprattuttu inghjiru à l'ecunumia, ogni intarvinanti à a tribuna hà soprattuttu tiratu à balli rossi nant'à a maghjurità tarrituriali. Ritinaremi par asempiu a sprissioni di Pierre Jean Luciani pà qualificà ss'avversari in particulari, "i naziunalindipendentisti", "u nostru avversariu cumunu", chjamendu à partasi da a sera di u 1a ghjiru à un'unioni larga chì pudaria andà "da u Front de Gauche fin'è ancu u Front National", d'appressu à u presidenti di u Dipartimentu pumuntincu. Unica donna è candidata à più ghjovana à purtà una lista mentri ss'alizzioni, Valérie Bozzi voli raprisintà a mudernità è l'ambizioni.

A stemi à senta.