SYVADEC è CITEO ani rinnuvatu u so cuntrattu cù u scopu di migliurà torna u spiccu in Corsica
(Julien Pernici - Alta Frequenza) - Ssu marcuri, u SYVADEC è CITEO ani rinnuvatu pà cinqui anni u so partinariatu pà u trattamentu di i rumenzuli in Corsica. CITEO, nomu novu d'Eco-Emballages, arreca una sparienza è finanziamenti in ssu duminiu, finanziamenti incitativi chì cambiani sicondu l'impegnu di i membri di u SYVADEC, ma chì sò passati da 150 000 auri à u principiu di l'ingaghjamentu à guasgi 3 millioni d'auri oghji, ciò chì dimostra i prugressi fatti inde u spiccu in Corsica da i cumunità di cumuni chì facini parti di u SYVADEC. Di fatti, u nivellu di l'imballasgi racolti in Corsica hè crisciutu di 24% in u 2016. U SYVADEC spera ch'ellu hà da pudè riceva u sustegnu di CITEO pà un prughjettu impurtanti, quillu d'avè i strutturi nicissarii par allargà torna i materii chì poni essa spiccati di pettu à i materii plastichi, pà pudè spiccà sopralocu, par asempiu, i vasetti di yaourt. Un prughjettu chì accumpagna un'ambizioni più impurtanti, quilla di ghjunghja, à mezu andà, à riciclà certi rumenzuli racolti direttamenti in Corsica.
Steti à François Tatti, u presidenti di u SYVADEC.
