Ségolène Royal se saisit du dossier du passage de l'épave du Costa Concordia au large de la Corse
(A redazzioni d'Alta Frequenza) - Da quì à calchì ghjornu, u Costa Concordia sarà purtatu da l'isula di Giglio in Tuscana fin'è u locu induva ellu sarà demulitu. Prublema : u traghjettu chì hè privistu passa vicinu à i costi corsi, ch'ellu si trattesi di a piaghja urientali, di u rughjoni bastiacciu o di u Capicorsu, ancu ind'i lochi assai sinsibuli à u nivellu eculogicu. U risicu di pulluzioni essendu riali ancu d'appressu à a sucità chì assicureghja l'uparazioni, u merri di Bastia, Gilles Simeoni, hà dumandatu l'intarvinzioni di a ministra di l'Eculugia, Ségolène Royal, par via di ss'inchietudini. Ssu marcuri, a ministra hà chjamatu u merri di Bastia pà falli sapè ch'ella sparti u so timori. Di fattu, di pettu à l'incumprensioni inghjiru à ssa quistioni quì, quissa quì hà da lampà una chjama à u Statu talianu pà cunnoscia i misuri di securità chì sarani presi, i pussibilità di mudificazioni di u traghjettu, è hà dittu ch'ella era pronta à mubilizà un battellu pà firmà attenti à ssu trasferimentu è schisà qualsiasi prublema à u largu di i costi corsi. Infini, Ségolène Royal pudaria vena in Corsica u ghjornu di u passaghju di u battellu à u largu di i costi.
Sur le même sujet
