Rolland Courbis nous a quittés
Era un ghjucadori è un addistradori miticu di l’AC Aiacciu : Rolland Courbis si n’hè andatu à l’eternu.
A so morti si hè sappiuta luni matina, è hà cumossu parichji parsoni in Aiacciu, in Corsica è aldilà.
Rolland Courbis ghjucaia in difesa cù l’AC Aiacciu, à l’entra di l’anni sittanta.
Erani tandu l’annati gluriosi di a squadra, cù Marius Trésor, François M’Pelé, Dominique Baratelli, Etienne Sansonetti è Claude Leroy.
Rolland avia ritrovu l’ACA parichji anni dopu, da addistradori tandu.
Ed hè issendu à u so cumandu ch’iddu hà purtatu a squadra in prima divisioni fatta a staghjoni 2001-2002, piddendu si ancu u titulu di campion’di francia di siconda divisioni.
Tarrucconu, macagnonu, francu di parolla, Rolland Courbis era priziatu in Aiacciu.
Hà dittu l’ACA sta mani in a so cumunicazioni chì « Rolland tinia caru à l’ACA, è l’ACA tinia caru à Rolland ».
Rolland Courbis avia mandatu un videomissaghju à a nova squadra dirighjenti aiaccina, d’uttrovi, augurendu li a riescita à l’inizià di u so travaddu di ricustruzzioni.
