Rentrée solennelle du Tribunal de Grande Instance d'Ajaccio
(A redazzioni d'Alta Frequenza) - Ssu 20 di ghjinnaghju, era a riintrata ufficiali, in tutti i casi pà a Corsica Suttana, di u tribunali di grandi istanza, quillu di i prurd'hommes è dinò di quillu di cummerciu. Aldilà di l'aspettu sulennu di ssi manifistazioni, ssi riintrati parmettini di fà un puntu annnat'à l'annata scorsa eppo di prisintà i perspettivi di quilla chì principia. U prucuratori di a Republica hè prisenti à ssi trè manifistazioni ed era dunqua u casu stamani (marcuri) in u Palazzu di Ghjustizia d'Aiacciu pà a riintrata di u TGI. Suddisfazioni pà l'amministrazioni ghjudiziaria è ghjuridica, ciò ch'è no chjamemi u "stock di cartulari chì aspettani" hè statu riduttu di una manera impurtanti. Aldilà di i sciffri esatti, si pò dì chì a criminalità in u dipartimentu di Corsica Suttana cunnosci una calata impurtanti. Ùn sò micca i fatti di ss'ultimi ori chì farani cambià a tindenza, ma a grandi criminalità, l'umicidii, l'assassinii, l'arrubecci armati, cunnoscini in u dipartimentu una calata significativa. Eppuru, ci sò sempri punti d'inchietudini, par asempiu una crescita cunsiquenti di l'arrubecci in casa, di i viulenzi à i parsoni, soprattuttu nentru à i famighji, è u prublema guasgi sempiternu di a droga.
Steti à senta à Eric Bouillard, u prucuratori di a Republica d'Aiacciu.
Sur le même sujet
