Le Direct

Rentrée du Tribunal de Grande Instance d'Ajaccio : une année 2017 plutôt positive, une année 2018 de chantiers

(A redazzioni d'Alta Frequenza) - Riintrata sulenna ssu marcuri in Aiacciu di u Tribunali di Grandi Istanza, com'è ogni annu à listessa epica. L'uccasioni di fà u bilanciu di l'annata scorsa in tarmini d'attività di a ghjuridizzioni è di lampà i basi di quilla chì s'apri. S'hè custatatu cusì in u 2017 una calata mezana di a delinquenza, frà altru di l'arrubecci in casa chì aviani cunnisciutu una crescita putenti in u 2016. A delinquenza stradali cunnosci una piccula calata, cù 10 morti nant'à i stradi di Corsica Suttana, vali à dì 4 di menu di pettu à l'annu scorsu. Inveci, ritruvemi una crescita pà altri fatti nant'à u dipartimentu, cù 10 arrubecci armati è una prova, 3 umicidi è 8 provi, 7 attentati splusivi è 2 provi, mentri chì si custata una prugressioni nova di l'armi cunfiscati. U prublema di a droga ferma dinò impurtanti, cù a scuparta di traffichi novi, di cunfiscazioni novi, frà altru d'eruina è di cucaina. Cuncirnendu i bè criminali, 357 000 auri in valori sò stati presi da u Gruppamentu di Gendarmeria in u 2017, mentri chì nant'à i 6,7 millioni d'auri cunfiscati da a direzzioni regiunali di a pulizza ghjudiziaria d'Aiacciu, guasgi 2 millioni ani cuncirnatu u TGI di a Cità imperiali. Infini, l'annunziu di a criazioni di un stabilimentu penitenziariu par Aiacciu hè stata cunfirmata, mentri chì l'incidenti accadutu a simana passata in a prighjoni di Borgu ferma stampatu in menti à tutti.

Steti à senta à Eric Bouillard, u prucuratori di a Republica d'Aiacciu.