Rencontre Corsica Libera/Femu a Corsica : une première étape importante pour J-C Angelini
(A redazzioni d'Alta Frequenza) - I Ghjurnati Internaziunali di Corti, evenimentu puliticu maiò di l'istati inde l'isula urganizatu da Corsica Libera, si sò compii ssa dumenica à sera. S'è i dilegazioni internaziunali erani torna numarosi, cù dibattiti di bunissima fattura, hè soprattuttu a situazioni pulitica di a Corsica chì sarà stata com'è sempri à u centru di tutti l'attinzioni, à quattru mesi di l'alizzioni tarrituriali. Nisun invitatu fora di u muvimentu naziunali quist'annu, ma un scontru micca publicu trà Corsica Libera è Femu a Corsica. Una prima riunioni, chì ni duvaria inghjinnà altri, pà sbuccà annant'à una "cunvergenza naziunali", un'adunita larga di a famighja naziunalista pà i tarrituriali, à u sicondu o à u terzu ghjiru. Ognunu sarà inveci da u so cantu pà u prima ghjiru di l'alizzioni. L'autunumisti sò stati pà contu soiu cuntenti dinò di i scambii intarvinuti ssa dumenica dopu meziornu in Corti duranti ssa riunioni. Una dilegazioni impurtanti di Femu s'era spiazzata, fora di Gilles Simeoni, assenti par raghjoni parsunali, Fabienne Giovannini è Christine Colonna. Pà u presidenti di u gruppu Femu a Corsica à l'Assemblea di Corsica, ss'appuntamentu hè u prima di tutta una seria, prima di ghjunghja, parchì micca, fin'è ssa famosa cunvergenza naziunali. In a materia, u Padduc pudaria essa una spezia di puntu di spiccanza trà i dui muvimenti, postu chì punti chì ùn sò micca cunvergenti ghjustu appuntu asistini ?
Steti à senta à Ghjuvan Cristofanu Angelini.
Sur le même sujet
