Le Direct

Remorquage du Costa Concordia : l'heure de la mobilisation a sonné

(A redazzioni d'Alta Frequenza) - U trasportu da quì à pocu di u Costa Concordia da l'isula di Giglio in Tuscana fin'è Ghjenuva cuntinueghja à fà parlà d'ellu. L'ultimu episodiu, vali à dì u ricusu da u Statu talianu di risponda à i dumandi di a ministra di l'Eculugia Ségolène Royal cuncirnendu a securisazioni di ssu trasportu, i risichi di pulluzioni pussibuli è u so traghjettu, postu chì quissu quì hà da passà à u largu di a Corsica, hà fattu riagiscia u merri di Bastia, Gilles Simeoni. In un cumunicatu, invita "tutti l'eletti, sindicati, associ, è curpurazioni chì si volini mubilizà à una riunioni in casa cumuna di Bastia, luni u 21 di lugliu à 10 ori di mani, pà pudè difiniscia insemi i mudalità di a mubilisazioni à ingaghjà par uttena suddisfazioni". U merri di Bastia dici di fattu chì "u patrimoniu eculogicu è ambientali di a Corsica faci parti di u patrimoniu cullittivu di i Corsi. I Stati com'è i grandi gruppi è consortiums privati a devini capiscia, com'elli devini capiscia ch'è no ùn lacaremi mai ssu patrimoniu quì essa minacciatu o toccu", è chì "senza ss'infurmazioni è guaranzii, ùn pudemi mancu appena accittà chì u Costa Concordia passessi davanti i nostri corsi, è soprattuttu in un perimetru di u futuru parcu naziunali marinu, vicinu à u Capicorsu".