Remaniement ministériel : la madame Corse du gouvernement débarquée
(A redazzioni d'Alta Frequenza) - Ùn hè micca a nutizia a più famosa podassi di u ghjornu, in tutti i casi pà tutti quilli chì s'intaressani à l'avvena custituziunali è istituziunali di a Corsica. In fatti, à l'uccasioni di un cambiamentu novu di parechji ministri ssu ghjovi, ci n'hè statu unu maiò. Marylise Lebranchu, ministra di a riforma di u Statu, di a Dicintralisazioni è di a Funzioni publica, ùn hè micca stata mantinuta. Suvitava da vicinu dipoi u principiu di u mandatu di François Hollande u cartulari corsu. Cuufficialità, statutu di residenti, fiscalità, cullittività unica, quilla ch'è pudiami cugnumà a "madama Corsica" di u guvernu, è chì intrattinia rilazioni boni cù a raprisintazioni pulitica isulana, si ni và dunqua da u guvernu. Avvedaci Marylise Lebranchu è bonghjornu Jean Michel Baylet ! U presidenti di u Partitu Radicali di Manca hè statu numinatu ministru di l'accunciamentu di u tarritoriu, di a ruralità è di i cullittività tarrituriali. Un "cartulari corsu" chì pudaria intarissà dinò à Estelle Grelier, secretaria di Statu ind'è Jean Michel Baylet, in carica di i cullittività tarrituriali. Una nutizia chì, senza essa culpatoru, ùn farà micca trasaltà di gioia a maghjurità nova à l'Assemblea di Corsica, soprattuttu quandu si sà i rilazioni ch'elli intrattenini u presidenti naziunali di u PRG è l'anzianu presidenti di l'Esecutivu è membru di ssu listessu partitu Paul Giacobbi, missi in risaltu duranti a mandatura scorsa. Ramintemi infini chì un appuntamentu trà a raprisintazioni pulitica corsa è Marylise Lebranchu era statu prugrammatu pà marti chì veni par amintà par asempiu i famosi urdinanzi rilativi à a cullittività unica. Wait and see...
Sur le même sujet
