Questions orales : nouvelle intervention de Michel Stefani sur la SNCM
(A redazzioni d'Alta Frequenza) -L'Assemblea di Corsica hè dunqua adunita ssi dui ghjorni (ghjovi è vennari) pà una riunioni nova è un prugramma carcu. Muzioni impurtanti sarani posti par asempiu, com'è annant'à l'aduzzioni di una legi d'annistia, a SNCM è a Xylella Fastidiosa. Ma prima, i cunsighjeri tarrituriali ani pussutu, com'è sempri, intarrugà l'Esecutivu duranti a seenza di i quistioni urali stamani. In u prugramma par asempiu, intarrugazioni annant'à a riabilitazioni di u Paisolu d'Aitone, paesi di vancazi sarratu in u 2002, ma dinò nant'à i fochi, imprestiti ditti tossichi, o ancu cuncirnendu a riforma di u culleghju è un periculu pussibuli pà a lingua corsa. À mezu à i cartulari bullenti, quillu di a SNCM hè statu torna trattatu largamenti. S'è u cunsighjeru tarrituriali Femu a Corsica Ghjuvan Cristofanu Angelini hà vulsutu parlà à l'Esecutivu di i misuri di cumpensazioni accurdati à l'intrapresi dopu a greva di l'ultimu istati da u Statu, chì ùn bastani micca par ellu, u cumunistu Michel Stefani, chì cunnosci strabè u cartulari di a cumpagnia marittima, hà lampatu una chjama sincera à Paul Giacobbi. Ramintendu l'ultimi evenimenti ghjuridichi cuncirnendu a cumpagnia, fora di l'ultimu di ssu marcuri, u cunsighjeru tarrituriali dici ch'ellu ùn capisci micca l'annunziu di u presidenti di l'Esecutivu di ùn pagà più u serviziu rializatu da a SNCM amintendu a Ghjurisprudenza Deggendorf, chì veni da u nomu di a sucità alimana chì, com'è a SNCM, avia toccu suvvenzioni di u so guvernu federali par asempiu. Incalchendu annant'à u fattu chì a SNCM pò bè campà, Michel Stefani hà fattu trè dumandi di primura à Paul Giacobbi, pà a cuntinuità di u serviziu publicu marittimu trà a Corsica è u cuntinenti.
Steti à senta à Michel Stefani.
Sur le même sujet
