Le Direct

Procès des gîtes ruraux : une des prévenues revient sur ses déclarations

(A redazzioni d'Alta Frequenza) - Terzu ghjornu di u prucessu di l'alloghji campagnoli davanti u Tribunali Currizziunali di Bastia. Una matinata chì hà vistu a scuntintezza di Paul Giacobbi, chì intarrugatu nant'à l'impurtanza di u merri di Multifau Serge Grisoni, chì oghji ùn hè più vivu, in u quadru di a so alizzioni à a presidenza di u Cunsighju Generali di Corsica Suprana da l'avucatu di l'associu ANTICOR, hè statu surpresu ch'ellu "si fessi pulitica in un tribunali", ramintendu ch'ellu hà "passatu a so vita à luttà contr'à u micca legali [...] à u risicu di a so carriera pulitica". Altru evenimentu, u cambiamentu di Faustine Arrighi chì hà adimessu à u cuntrariu di ciò chì era statu dittu davanti u ghjudici, avè cacciatu, riimpiutu è postu u cartulari purtendu u nomu di u so maritu Pierre Paul. Un cartulari postu pà trè alloghji campagnoli, cù infini pà unica custruzzioni una casa. Quissa quì, secretaria di Thierry Gamba Martini in u cunsighju generali à l'epica di i fatti è oghji secretaria di u gruppu Prima a Corsica à l'Assemblea di Corsica, hà accertatu ch'ella ùn avia pussutu parlà di u so prughjettu à Thierry Gamba Martini, postu ch'ella era di riposu in maternità à l'epica.

Rimarchi nant'à a so paga sò stati fatti dinò, ciò chì hà annarbatu l'avucatu di u coppiu Arrighi, maestru Olivier Combe.