Procès des gîtes ruraux : Paul Giacobbi à la barre
(A redazzioni d'Alta Frequenza) - Principiu di a siconda simana di u prucessu di l'alloghji campagnoli davanti u Tribunali Currizziunali di Bastia. Dopu à un passaghju cortu à a barra di Jean Marc Domarchi chì hà qualificatu di buciardu Thierry Gamba Martini di pettu à a so virsioni di a lita trà l'unu è l'altru in u 2012 in u cunsighju generali di Corsica Suprana, hè Paul Giacobbi chì hà principiatu u so passaghju à a barra. U presidenti di u Cunsighju Generali di Corsica Suprana à l'epica di i fatti, chì sò accaduti trà u 2007 è u 2010, hà incalcatu nant'à una virsioni chjara è netta : nè nanzi nè duranti, nè dopu a so struzzioni, ùn hà micca vistu passà cartulari di suvvenzioni sottu à i so ochji. Paul Giacobbi accerta ch'ellu hà fattu cunfidenza à l'amministrativi è à i quattru nivelli di cuntrollu abituali, postu chì nisun presidenti di cunsighju generali t'hà u tempu d'appressu à ellu di fighjulà in u ditagliu i cartulari. Di fattu, par ellu, sò i mancanzi di l'amministrativi chì ani inghjinnatu ssa situazioni oghji. Cuncirnendu l'adopru di simplici listini di nomi in cumissioni, Paul Giacobbi hà dittu chì ssu gennaru di pratica ùn hà nulla di famosu è ch'ella hè ancu aduprata à l'Assemblea Naziunali. Nant'à a vicinanza chì certi privenuti t'avariani cun ellu, hà spiegatu chì u fattu di pighjà nomi di ghjuvanotta o d'altri membri di a famighja l'impidiscia d'avè qualsiasi cunniscenza nant'à ssu sughjettu. Infini, l'elementi di u cartulari "u portani à pinsà" chì Dominique Domarchi hà pussutu agiscia cusì senza parlanni.
