Procès des gîtes ruraux : le défilé des bénéficiaires continue
(A redazzioni d'Alta Frequenza) - Sicondu ghjornu d'audienza in u Tribunali Currizziunali di Bastia in u quadru di u prucessu di l'alloghji campagnoli. I benefiziari passani sempri à a barra pà spiegassi. Di fattu, trè di i benefiziari ani appruntatu cartulari di suvvenzioni guasgi simuli, falsi fatturi è sbagli d'ortografia ancu, pà prughjetti d'alloghji campagnoli in bor di strada naziunali pà certi. Un affari chì hà intarissatu propiu u prucuratori di a Republica di Bastia, Nicolas Bessone, chì hà pruvatu à cità nomi d'eletti à unu di i privenuti pà metta un omu nant'à a parsona pussibuli chì avaria pussutu appruntà ssi trè cartulari, senza successu, u privinutu rispundendu innò ad ogni nomu d'elettu citatu, ma dinò à a dumanda "t'eti a paura?" posta da u prucuratori. Pà a prima volta in ssu prucessu, Paul Giacobbi hè statu intarrugatu duranti un tempu cortu pà sapè s'ellu avia fattu a leia trà Jean Philippe Martinetti, privenutu, è u so babbu, Jean Charles, merri à l'epica di i Prunelli di Fium'Orbu è oramai mortu. Di fattu, par avà, a fumaccia hè sempri pagna in ssu prucessu.
Sur le même sujet
