Procès d'un important trafic de drogue à Bastia : des condamnations jusqu'à 15 ans de prison ferme
(A ridazzioni d'Alta Frequenza) - U tribunali currizziunali di Bastia hà datu u so ghjudicamentu, pà l’affari llu trafficu di droga missu à bassu in u 2017, dopu à una presa di 15 chilò di cuccaina in una vittura, à nantu à u portu di Bastia. Pà a maior’parti di i trenta dui incausati, i ghjudici ani crisciutu i dumandi lla pracura. Jean-Louis Binvignat, vistu com’è u capimachja llu trafficu, hè statu cundannatu à quindici anni fermi, cù 80000 € d’amenda pà impurtazioni è trasportu d’allupianti è droghi. U so frateddu, Mike, suspittatu di sicundà lu, si hè buscu ancu iddu quindici anni fermi, cù 70000€ d’amenda. Jean-Christophe Bracconi, chì a pracura vidi da rispunsevuli lla lughjistica, si hè buscu ott’anni fermi è 40000€ d’amenda. Dorian Bilger, mezu grussistu pà a pracura, si hè presu ott’anni fermi è 20000€ d’amenda, ma dinò cinqui anni d’intirdizzioni di sughjornu in Corsica. Pà l’altri incausati, i cundanni vani da quattru mesi attimpati à sei anni fermi, sicondu à impurtanza lli fatti chì li sò rimpruvarati. Cù certi cundanni, ci sarà dinò a cunfiscazioni lli presi fatti.
Stemu à senta à Marc-Antoine Luca, l’avucatu di Dorian Bilger
