Prisonniers politiques : Christiane Taubira poursuit le dialogue avec la Corse
(A redazzioni d'Alta Frequenza) - A ministra di a Ghjustizia Christiane Taubira hà ricivutu dunqua ssu marcuri, in fin di ghjurnata, una dilegazioni cumposta di u presidenti di l'Esecutivu, di u presidenti di l'Assemblea di Corsica, di i presidenti di gruppi pulitichi di ssa listessa assemblea, eppo membri di l'Associu Sulidarità, Aiutu Paisanu è a Liga di i Diritti di l'Omi. Duranti ssa riunioni, a quistioni di i prighjuneri pulitichi corsi è quilla di una dumanda d'annistia sò stati amintati. Ed hè soprattuttu a prima chì hè stata trattata largamenti, a ministra di a Ghjustizia ramintendu chì i ditenuti chì t'ani i "criterii ughjettivi" ghjustifichendu un trasferimentu da i prighjoni di u cuntinenti fin'è Borgu vedini bè a so dumanda accurdata (41 sò stati avvicinati dipoi maghju di u 2012). Christiane Taubira hà fattu sapè torna a so vulintà di tena un dialogu cuntinuu cù l'eletti è i raprisintanti di a sucità civili corsa, pà favurizà, ogni volta ch'ella a parmetti a situazioni, u mantenimentu di i liami famigliali. Cuncirnendu u cartulari più difficiuli è propiu puliticu di a dumanda d'annistia, a ministra hà dittu ch'ella ùn hà micca i mezi di pighjà da par ella una dicisioni par avà, postu ch'ella ùn hà micca "mandatu puliticu", d'appressu à ella. L'eletti di a dilegazioni corsa parini abbastanza cuntenti di u discorsu di Christiane Taubira; hè u casu di Jean Charles Orsucci, u presidenti di u gruppu di a maghjurità tarrituriali è à l'urighjini di a dumanda di prughjettu di legi annant'à l'annistia di i prighjuneri pulitichi corsi.
Steti à senta à Jean Charles Orsucci dopu à ssa riunioni in Parighji.
Sur le même sujet
