Prise en charge du coût de transport des déchets : les réactions de Xavier Lacombe, François Orlandi, Pierre Poli et Gilles Simeoni

A sittimana scursa, a CDC hà vutatu un raportu, da ch’iddu sichi presu in carica u trasportu di i balli di rumenzuli versu l’incinnaratori di a righjoni PACA. Si parla chivi d’un bughjettu di 2,9 miliona d’auri.
Cacciatu issu raportu, chì marca unu sforzu suldarinu impurtanti, si hè fattu dibattitu in ghjiru à i scelti strategichi pà u trattamentu lli rumenzuli.

À nomu di u gruppu « Pà l’Avvena », Xavier Lacombe hà dittu ch’idd’era ora di pona si a quistioni d’un pianu righjunali chì, à senta lu, ùn viaghja.
« Quand’iddu si parla d’autunumia » hà dittu l’elettu, « hè difficiuli di cuncipì chì ciò ch’iddu si ricusa in casa soia sichi mandatu ind’è l’altri, in u paesu amicu ».

Stemu lu à senta.

Pierre Poli, prisidenti di u gruppu PNC, hà dittu ch’iddu tocca à ugnunu à ricunnoscia i so dibulezzi, ma chì tutta a rispunsabilità, ùn ci voli à sciaccà la à a Cullittività di Corsica. Chì, pricisa u merri d’Eccica è Suaredda, mancaia calchissia in issi dibattiti è presi di dicisioni : u SYVADEC.
Oghji, s’iddu hè crisciutu u prezzu llu trattamentu, u SYVADEC n’hè in parti rispunsevuli.
Pierre Poli hà vulsutu quantunca salutà i parsunala chì t’ani in carica l’accolta di i rumenzuli.

Stemu lu à senta.

À nomu di u gruppu « Andà par Dumani », François Orlandi hà palisatu a tistardizia di a maiurità, di pettu à a situazioni ginirali in Corsica. Hà cuntrastatu u ricusu lla maiurità di ricunnoscia a nicissità di a spurtazioni, di pettu à l’utupia di a trascelta chì porta u pianu. François Orlandi hà rigritatu ch’idd’ùn ci sichi un pianu di succorsu.

Stemu lu à senta.

Gilles Simeoni, infini, hà vulsutu rimetta i cosi in piazza : à senta lu, issa spurtazioni hè stata pussibuli chì l’incinnaratori in PACA accuddiani menu rumenzuli cù a crisa llu coronavirus, è risicaiani tandu à chjuda.
Tandu, pinsà à un incinnaratori riveni à lacà corra di manera difinitiva l’idea di a trascelta.
U prisidenti di l’esecutivu hà vulsutu dinò palisà, incù forza, u disimpegnu di u statu.

Stemu lu à senta.