Point sur les intempéries qui touchent la Haute-Corse

(A redazzioni d'Alta Frequenza) - Hè un primu sabbatu di nuvembri sottu à a timpesta pà a Corsica Suprana. U fenomenu, chì hà cuminciatu ind'a sirata di vennari à sabbatu, hè statu particularmenti viulenti tutta a nuttata. In fatti, sò guasgi 12 000 impatti di saetta chì sò stati rilevati , inveci chì l'acquati sò andati fin'è i 100 millimetri in ritinuta nant'à u rughjoni bastiacciu, pà cullà fin'è più di 150 millimetri ind'u rughjoni di a Sulinzara. S'è ùn ci hè nisunu feritu, si poni rilevà assai disguasti nant'à tutti i lochi bastiacci. U trafficu stradali, duranti tutta a matinata, hè statu assai disturbatu. Ci voli à dì chì u tunnelu di Bastia, è u mini tunnelu di u ghjiratoghju Noghès sò stati annigati, è ùn sarani micca riaparti nanzi à stasera, o ancu dumani matina (dumenica). Pà ciò chì tocca à a RN 193, hè stata taghjata in parechji lochi, frà altru in Casatorra è vicinu à u ghjiratoghju di Furiani, disturbi chì svaniscini à pocu à pocu, com'è nant'à a reta dipartimintali. Numarosi stradi di paesi sò stati inundati o bluccati da falati di petri, ma à mità di dopu meziornu, nisunu paesi era taghjatu da u restu di a Corsica. In quantu à i disguasti matiriali, s'hè schisatu u peghju. S'è in Bastia, u teatru è u sinemà Le Régent sò stati annigati, com'è u centru cumiriciali Hyper U à u meziornu di a cità, si rilevani soprattuttu cantini inundati. Hè racumandatu assai di fà casu à i falati di curnici ind'u centru cità di Bastia, duva vitturi sò stati spiazzati da schisà qualsiasi accidenti. Infini, l'elettricità è u telefunu voltani à pocu à pocu ind'i casi tocchi da i taghjaturi, soprattuttu in Castagniccia, in Capicorsu è ind'u Curtinesi. S'hè rilevatu fin'è 10 000 casi senza elettricità versu meziornu, ma issu numaru hè calatu, postu chì 4 000 casi sò in u bughju par avà, soprattuttu in Bastia, ind'u Curtinesi, ind'u rughjoni di a Ghisunaccia è di Merusaglia. Parechji parsoni ùn ani più ligna di telefunu fissu, inveci chì a reta mobili t'hà certi emettori chì viaghjani nant'à battarii, una situazioni chì ùn pudarà durà tantu, risichendu di perda una parti di a reta. Pà ciò chì tocca à u tempu, s'è a situazioni pari d'essa si calmata appena dipoi 3 ori di dopu meziornu, l'acquati forti è a timpesta duvariani vultà da quì à pocu, ind'un dipartimentu sempri in prudenza arancia à volta pà l'acquati è l'inundazioni inghjinnati, ma dinò pà a marighjata pudendu tuccà cù forza u litturali, u mari essendu smuntatu da u ventu. Issu mumentu novu di u disturbu meteurulogicu hè privistu pà a nuttata sana. Hè dunqua assai cunsighjatu di fà casu più cà mai.