Point sur la vigilance orange orages-pluie-inondation en Corse-du-Sud
(A redazzioni d'Alta Frequenza) - U timpurali in Corsica Suttana, soprattuttu in muntagna, à livanti è à meziornu di l'isula, cuntinueghja cù un'intensità chì cala pà l'ori chì venini. Annant'à 24 ori, 230 mm d'acqua sò stati rilevati in Quenza, 170 mm in Zicavu, 130 mm in Bunifaziu, 100 mm in Sartè è 80 mm in Aiacciu. Fin'è meziornu, l'acquati duvariani falà à u meziornu di una linea Aiacciu - Purtivechju, mentri chì à u nordu di ssa ligna, piuvarà sempri cù menu intensità. Dopu meziornu, acquati novi sò aspittati in tuttu u dipartimentu, cù un cumulu annant'à 12 ori di 30 mm d'acqua aspittatu. U dipartimentu, in particulari i lochi aiaccini, sarà toccu duranti a ghjurnata da una vintata forti, suffiendu fin'è 100 chilometri par ora. I spignifochi ani fattu par avà 23 intarvinzioni liati à u gattivu tempu, cù 21 parsoni missi in securità in u suttanu è u rughjonu di u Rizzanesi. A circulazioni hè difficiuli annant'à certi stradi di u dipartimentu, induv'elli travaghjani i servizi di u cunsighju dipartimintali è di a Cullittività Tarrituriali di Corsica. L'attinzioni di l'automobilisti hè dumandata par asempiu pà ssi punti quì :
- strada tarrituriali 40 trà u ponti d'Arena Bianca è u crucivia di Livia
- strada tarrituriali 10 à u nivellu di u Ponti di l'Osu trà Purtivechju è Lecci
- strada tarrituriali 157 trà Sarra di Farru è Ulmetu
- strada tarrituriali 268 in u rughjonu di Livia
I cunsigni di prudenza rilativi à a vigilenza arancia "timpurali-acqua-inundazioni" s'appiegani sempri. À ssu mumentu di crescita di u trafficu in principiu di ghjurnata, a necessità di una vigilenza maiò hè racumandata à tutti l'automobilisti, invitati à riducia à u più i so spiazzamenti. I servizi di u Statu, di u SDIS è di i cullittività cuncirnati fermani assai mubilizati.
