Plusieurs interpellations de jeunes militants nationalistes en Haute-Corse
Marcuri, à l’alba matina, setti ghjovani militanti naziunalisti sò stati arristati è missi in guardia à vista. In gran’ parti, sò uriginarii di a Balagna. Cinqui trà iddi sò stati purtati in u campu militaru di Borgu. Culandi sò stati intesi in u quadru d’un cartulari chì saria in rilazioni cù l’evenimenti successi dopu à l’assassiniu d’Yvan Colonna.
Trà i riazzioni, eccu quidda di u cullittivu « Patriotti » chì dici ch’una volta di più, mentri chì u ministru francesu veni à parlà di dialugu è d’evuluzioni pulitica à nantu à a noscia tarra, si facini i rastiddati u lindumani. U guvernu francesu devi scedda : riprissioni o dialugu ».
Femu a Corsica hà ripitutu chì « a paci ùn si pò custruì via a riprissioni è l’arristazioni, ma cù a missa in anda d’una suluzioni pulitica glubali pà a Corsica ».
Corsica Libara si pesa contru à « issa logica dannosa, chì ùn pò chè fà spuntà un sintimu di rivolta più chè lighjittimu di pettu à l’arbitrariu, è chì ùn l’hà da fà à intimurì un populu sanu, postu chì quissu hè l’ughjittivu chjaru d’issi manuvri ».
Davanti à u campu militaru di Borgu, u PNC era riprisintatu da Pascal Zagnoli, u so sicritariu naziunali, postu chì à u minimu unu di i so ghjovani militanti ci hè guardatu à vista.
Com’è l’altri partiti naziunalisti, u PNC cundanna issa riprissioni.
Steti à senta à Pasca Zagnoli
